MARIA JÜRGENS
Min Oma selech, woar os Vorbild. Se hätt Platt jekallt, woar neet dönn, äwer joot doabée; jeng nie erut ohne Höötsche opp dä jraue Kopp, koosch joot Eärtezupp koeke, Flecke opp de Bokse sette on wette Kräjelkes opp de Mäntelkes niéne. Se haat ene jruete Jaard met Prumebööm on Äppelbööm. Bee dat Woort „Oma“ hab ech emmer Riefkook, Prumetaat on Jriesspudding opp de Tong on ech habb en Wolk von Kölnisch-Water on Lavendel en de Naas. En Oma bruk de Enkelkenger neet opptetrecke, se kann se verwenne. On dat hätt se och noa Strech on Fade jedoen. Wat wör bee Mam neet dörfte, dat koosche wör jarantiert bee Oma dohn. |
Wat ess van däm all jebleeve on wat ess fort? Opp van Daach send Omas Frollütt öm 50 Joar erum, die ken Korschett, äwer Bodys on Jeans draje, sech en Fitness-Studios style, met de Enkelkenger noa Mallorca fleeje, met de Blare öm de Wett opp de PC tippe on opp en Trampolin herömhoppe. Omas van hüt hant ken Niéhmaschine te Huus erömstoén, doaför äwer en Mikrowell on en Cappucino-Maschin, könne prima Pizzas backe, Pommes make on Spajette-Bolonäs. Äwer jenau wie fröher kritt dat Enkelkenk van de Oma en Extra-Worsch jejolle, die et van de Mam neet kritt. On jenau wie fröher, vertellt man Oma dat, wat man sons kenne opp de Naas bengen deet. Hätt man dat Diktat fies doanäwe jehaue, wäm deet man dat flüstere? De Oma. |
|
Och wenn se
hüt ken jraue Hoar miér hätt,
äwer ruet jefärvt,
och wenn se
neet joot doabée ess, äwer
en Mannekäng – Figut hätt,
och wenn se
neet miér na Lavendel, äwer na Dior ruuke deet,
och wenn se
kenne Stek hätt, äwer doaför opp
Inlinerskater am erömjöcke ess,
Oma bliev Oma, denn opp et Hart kömmt et aan,
on dat hätt
se fröher wie och opp van
Dag an de Enkelkenger verlore.